Notícias do Vaticano em latim. Nesta edição: O Papa: acabar com a guerra que é sempre uma crueldade; Papa Francisco se encontra com os sacerdotes de Roma que completam dez anos de ordenação; O Santo Padre: não tenham medo dos migrantes. Mario Galgano dá a todos as cordiais boas-vindas a esta edição do boletim informativo em língua latina.
HEBDÓMADA PAPAE
NOTÍTIAE VATICÁNAE LATÍNE RÉDDITAE
Die primo mensis Iúlii anno bismillésimo vicésimo tértio
TÍTULI
Finis tandem imponátur bello, ait Póntifex, quod in dies fit crudélius.Romae presbýteros convénit Francíscus Papa usque ad decem annos ordinatiónis anniversárium recenséntes.Pontíficis mónitum: Nolíte migrántes timére.Salútem plúrimam ómnibus vobis audiéntibus núntios lingua latína dicit Maríus Galgano.
Ouça as notícias do Vatican News em latim!
NOTITIA 1
In Audiéntia Generáli precatiónes póstulat Póntifex pro innocéntibus, qui víctimae sunt dimicatiónum in Ucráina, Palæstína, Myanmar aliísque terrárum orbis locis, dolórem suum osténdens potíssimum pro párvulis qui «subrídere desiérunt”, sícuti quos abhínc nonnúllos dies convénit. Refert Olga Sakun.
Francísci verba ad id referúntur, quod usu venit die quarto et vicésimo praetérito mensis Máii, cum in Urbe Vaticána turmam parvulórum Ucrainórum ac Palaestinénsium recépit in Die Mundiáli Parvulórum celebrándo. In Audiéntia obtútum fixit Póntifex in ómnibus terrárum orbis párvulis. Postulávit ínsuper, ut precatiónes pro púeris Ucráinis adiceréntur ac ne Palaestíni et Israëlítae e memória elaberéntur, qui multa patiúntur. «Finis tandem imponátur bello!», ex quo púeri veheménter dolent.
NOTITIA 2
Postquam die décimo quarto mensis Máii presbýteros convénerat Francíscus quadragésimum et ultra sacerdotális ordinatiónis recenséntes annum, collóquium hábuit Francíscus apud Domum Piárum Discipulárum Divíni Magístri in Portuénsi regióne Urbis cum presbýteris, qui usque ad decem annos ab ordinatióne anniversárium recensuérunt. De his lóquitur Monia Parente.
Iunióres sacerdótes dioecésis «suae» visit Póntifex, quod áttinet saltem ad ordinatiónis annum, éxplicat epíscopus Míchaël Di Tolve, delegátus de diaconátus, cleri ac vitae religiósae cura, addens quod Summus Póntifex presbýteros auscultávit et cum eis mútuum diálogum instítuit.
NOTÍTIAE BREVIÓRES
Per televisíficum núntium, prae se feréntem precatiónes mense Iúnio agéndas, Francíscus cohortátus est ad orándum pro iis qui bellum ac famem effúgiunt, iter ex necessitáte suscipiéntes perículis violentiísque replétum, ut «recipiántur atque vitae item novae opportunitátes illis praebeántur».
Domus diurnariórum Sanctae Sedis moderátor, Matthǽus Bruni, assevérat Francíscum «rescivísse» de scriptis circa collocutiónem hábitam, cláusis iánuis, cum epíscopis Conferéntiae Episcopális Itáliae, dicens: «Nullátenus cúiquam iniúriam fácere vel homóphobis verbis quemquam lǽdere vóluit atque véniam ab iis petit, qui offénsos se putárunt».
Finem impónens primo Diéi Mundiális Parvulórum, qui duóbus diébus – scílicet vicésimo quinto et sexto mensis Máii – circa Pontíficem perpárvulos ex divérsis terrárum orbis regiónibus coadunávit, gratum ánimum suum iis osténdere váluit Francíscus Papa, qui hunc internationálem evéntum éffici studuérunt.
Haec ómnia sunt, quae dicénda putátum est; cétera nova próxima hebdómada. Valéte.
